पर्सा १९ कार्तिक पर्साको धोबीनी गाउँपालिका वडा नं. २ मा आगामी निर्वाचनलाई लक्षित गर्दै नेपाली कांग्रेसले आफ्नो संगठन सुदृढ बनाउने अभियानलाई तीव्रता दिएको छ। विगतका निर्वाचनमा जित हासिल गर्न नसकेको यस वडामा यसपटक नयाँ रणनीति र युवा नेतृत्वका साथ चुनावी मैदानमा उत्रिने तयारी भएपछि कांग्रेसका नेता तथा कार्यकर्तामा उत्साह बढेको छ।वडा अध्यक्ष पदका उम्मेदवारका रूपमा सुनील पटेलको नाम चर्चामा आएसँगै वडा नं. २ को राजनीतिक माहोल थप तातिएको छ। पार्टीभित्रको आन्तरिक समीक्षा, संगठन विस्तार तथा जनतासँगको निरन्तर संवादलाई प्राथमिकता दिँदै कांग्रेसले यसपटक विगतको चुनावी परिणाम उल्ट्याउने लक्ष्य लिएको छ।
युवा नेतृत्वलाई अघि सार्दै कांग्रेस
स्थानीय समस्या, विकास निर्माणका अधुरा काम तथा जनताका आधारभूत आवश्यकतालाई सम्बोधन गर्ने प्रतिबद्धतासहित सुनील पटेललाई अघि सारिएको कांग्रेससम्बद्ध नेताहरूको भनाइ छ। पार्टीका नेता, कार्यकर्ता तथा शुभेच्छुकहरू संगठन विस्तार र जनसम्पर्क अभियानमा सक्रिय हुँदै आएका छन।

शिक्षा, स्वास्थ्य, सडक, खानेपानी तथा अन्य पूर्वाधार विकासलाई प्राथमिकतामा राख्दै जनताको अपेक्षाअनुसार काम गर्ने योजनासहित पटेलले आफ्नो उम्मेदवारीलाई अघि बढाइरहेका छन।
विगतको चुनावी इतिहास बदल्ने दाउ
विगतमा नेपाली कांग्रेसले जित हासिल गर्न नसकेको वडा नं. २ मा यसपटक रुख चुनाव चिह्नलाई विजयी बनाउने रणनीतिका साथ पार्टीका नेता तथा कार्यकर्ताहरू सक्रिय भएका छन्। घरदैलो, भेटघाट र जनसंवादमार्फत मतदाताको विश्वास जित्ने प्रयास भइरहेको छ।

स्थानीयवासीसँगको भेटघाटका क्रममा उम्मेदवार सुनील पटेलले वडा नं. २ को समग्र विकास र जनताको सेवामा आफू समर्पित रहने प्रतिबद्धता व्यक्त गरेका छन्।
उनले भने, “हाम्रो मुख्य उद्देश्य धोबीनी वडा नं. २ का प्रत्येक नागरिकका समस्या पहिचान गरी समाधान गर्नु हो। विकास निर्माणका अधुरा काम पूरा गर्नुका साथै शिक्षा, स्वास्थ्य र पूर्वाधार क्षेत्रलाई प्राथमिकता दिएर नमुना वडा निर्माण गर्ने हाम्रो लक्ष्य छ। हामी केवल चुनाव जित्न होइन, जनताको विश्वास जितेर सेवामा समर्पित हुन चुनावी मैदानमा उत्रिएका छौँ।जनताको अपेक्षा र कांग्रेसको चुनावी चुनौती

लामो समयदेखि विकास र परिवर्तनको अपेक्षा गरिरहेका स्थानीयवासीमाझ यसपटकको निर्वाचनलाई विशेष चासोका साथ हेरिएको छ। सुनील पटेलको उम्मेदवारीले कांग्रेस कार्यकर्तामा नयाँ ऊर्जा थपेको देखिए पनि विगतको चुनावी परिणाम बदल्नु पार्टीका लागि मुख्य चुनौती रहनेछ।
युवा नेतृत्व, संगठनात्मक सक्रियता र विकासका एजेन्डालाई चुनावी अभियानको मुख्य आधार बनाएको नेपाली कांग्रेसले धोबीनी–२ मा यसपटक नयाँ इतिहास रच्ने दाबी गरिरहेको छ। अब आगामी निर्वाचनमा मतदाताले कसलाई आफ्नो नेतृत्व सुम्पिन्छन् भन्ने विषयले वडा नं. २ को राजनीतिक प्रतिस्पर्धालाई थप रोचक बनाउने देखिएको छ।