काठमाडौं २३ कार्तिक । रसुवा जिल्लाको याङ्खोला (भोटेकोशी) मा बाढीले बगाएको अस्थायी पैदल झोलुङ्गे पुल दोस्रो चरणमा पुनर्निर्माण गरी सञ्चालनमा ल्याइएको छ। स्थानीय बासिन्दाको आवतजावत सहज बनाउने उद्देश्यले जनप्रतिनिधि, सामाजिक संघसंस्था, सुरक्षा निकाय र स्थानीय समुदायको संयुक्त पहल तथा जनश्रमदानबाट पुल पुनर्निर्माण सम्पन्न गरिएको हो।
गत भदौ १० गते आएको विनाशकारी भोटेकोशी बाढीले जिल्लाका विभिन्न पुल तथा सडकमा क्षति पुर्‍याएको थियो। बाढीका कारण याङ्खोलास्थित पहिलो चरणमा निर्माण गरिएको अस्थायी पैदल पुलसमेत बगाएपछि स्थानीय बासिन्दालाई आवतजावतमा कठिनाइ भएको थियो। त्यसपछि स्थानीय समुदायले पुनः एकजुट भएर दोस्रो चरणको पुल निर्माण अभियान सञ्चालन गरेका थिए।

पुल पुनर्निर्माणका लागि विभिन्न सामाजिक संघसंस्था तथा निकायबाट आर्थिक र सामग्री सहयोग प्राप्त भएको थियो। पहिलो चरणको निर्माणका लागि Rotary Club, Rotary District 3292 तथा Rotary Community Corps Rasuwa (Rotary Club of Godawari द्वारा प्रायोजित) बाट ३ लाख ३ हजार रुपैयाँ सहयोग प्राप्त भएको थियो।
त्यस्तै, समाजसेवी विनोद आचार्यको पहलमा Family Stoffel Foundation र Shanti Sewa Griha बाट १ लाख ५५ हजार ७७८ रुपैयाँ बराबरको निर्माण सामग्री सहयोग गरिएको थियो। संजेन हाइड्रोपावरले १२० मिटर लामो डोरी उपलब्ध गराएको थियो। पहिलो चरणको निर्माणमा २५२ जना स्थानीय बासिन्दा र ६० जना सुरक्षाकर्मीले श्रमदान गरेका थिए।

पहिलो चरणको पुल बाढीले बगाएपछि दोस्रो चरणको पुनर्निर्माणका लागि Rotary Club, Rotary District 3292 तथा Rotary Community Corps Rasuwa बाट २ लाख ३० हजार रुपैयाँ र नेपाल रेडक्रस सोसाइटीबाट १ लाख २५ हजार रुपैयाँ आर्थिक सहयोग प्राप्त भएको थियो।
दोस्रो चरणको निर्माणमा २५० जना स्थानीय बासिन्दा र ५९ जना सुरक्षाकर्मीले श्रमदान गरेका थिए। दुवै चरणमा गरी आर्थिक तथा सामग्री सहयोगको कुल मूल्य ८ लाख १३ हजार ७७८ रुपैयाँ पुगेको छ।

पुल पुनर्निर्माण अभियानमा आमाछोदिङ्मो गाउँपालिकाकी उपाध्यक्ष चण्डिका तामाङ, वडा नं. २ का अध्यक्ष ल्हाक्पकामी तामाङ, वडा नं. ३ का अध्यक्ष सुरेन्द्र तामाङ, वडा नं. ४ का अध्यक्ष धर्म तामाङ र वडा नं. ५ का अध्यक्ष दावा गोम्बो तामाङले संयुक्त नेतृत्व तथा समन्वय गरेका थिए।
त्यसैगरी गाउँपालिकाका कर्मचारी, सामाजिक अभियन्ता मानबहादुर तामाङ, सोनाम छिरिङ तामाङ, सेलकर तामाङलगायत स्थानीय अगुवाहरूले पुनर्निर्माणमा सक्रिय भूमिका निर्वाह गरेका थिए।

जिल्ला प्रशासन कार्यालयको समन्वयमा नेपाली सेना, नेपाल प्रहरी र सशस्त्र प्रहरी बलका सुरक्षाकर्मीले समेत दुवै चरणको निर्माणमा श्रम सहयोग गरेका थिए। निर्माण कार्यमा खटिएका श्रमिक तथा सुरक्षाकर्मीका लागि गाउँपालिकाभरिका स्थानीय आमाहरूले खाजाको व्यवस्थापनसमेत गरेका थिए।
पुल पुनर्निर्माणमा सहयोग गर्ने Rotary Club, Rotary District 3292, Rotary Community Corps Rasuwa, Rotary Club of Godawari, Family Stoffel Foundation, Shanti Sewa Griha, नेपाल रेडक्रस सोसाइटी, संजेन हाइड्रोपावर, जिल्ला प्रशासन कार्यालय, सुरक्षा निकाय, जनप्रतिनिधि तथा सम्पूर्ण श्रमदाताप्रति आयोजक पक्षले धन्यवाद व्यक्त गरेको छ।

बाढीले पुल बगाएपछि निराश नभई स्थानीयवासी, सामाजिक संघसंस्था, जनप्रतिनिधि र सुरक्षा निकाय एकजुट भएर पुनः पुल निर्माण गर्नुले सामाजिक एकता र सामूहिक सहकार्यको उत्कृष्ट उदाहरण प्रस्तुत गरेको छ।
याङ्खोलामा निर्माण भएको अस्थायी पैदल झोलुङ्गे पुल केवल आवतजावतको माध्यम मात्र नभई विपद्का बेला एकअर्कालाई साथ दिने मानवीय भावना, साझा जिम्मेवारी र जनश्रमदानको प्रतीकसमेत बनेको छ।