सिन्धुपाल्चोकमा भारत सरकारको सहयोगमा दुई स्वास्थ्य चौकी भवनको शिलान्यास

पौष १ काठमाडौँ ___ सिन्धुपाल्चोक जिल्लाको इन्द्रावती गाउँपालिकामा भारत सरकारको आर्थिक सहयोगमा दुई वटा स्वास्थ्य चौकी भवन निर्माण हुने भएको छ । ईन्द्रावती गाउँपालिका–३ र वडा नम्बर ६ मा निर्माण गरिने स्वास्थ्य चौकी भवनको आज एक समारोहबीच शिलान्यास गरिएको हो । शिलान्यास कार्यक्रममा इन्द्रावती गाउँपालिकाका अध्यक्ष झम्क नाथ नेपाल र भारतीय राजदूतावासका प्रथम सचिव नारायण सिंहले संयुक्त रूपमा शिलान्यास गरे ।

भारत सरकारको करिब ४ करोड नेपाली रुपैयाँको आर्थिक सहयोगमा निर्माण हुने यी स्वास्थ्य चौकी भवनहरू दुई तल्ले हुनेछन् । आवश्यक स्वास्थ्य सेवा प्रवाहका लागि उपयुक्त पूर्वाधार तथा सुविधासहित भवन निर्माण गरिने जनाइएको छ । यी परियोजनाहरू उच्च प्रभाव सामुदायिक विकास परियोजनाअन्तर्गत अघि बढाइएका हुन्, जसको कार्यान्वयन गाउँपालिकामार्फत गरिनेछ ।

शिलान्यास समारोहमा गाउँपालिकाका अध्यक्षसहित स्थानीय जनप्रतिनिधि तथा अन्य सरोकारवालाहरूले भारत सरकारले निरन्तर रूपमा प्रदान गर्दै आएको विकास सहयोगप्रति प्रशंसा व्यक्त गरे । निर्माण सम्पन्न भएपछि यस क्षेत्रका नागरिकहरूको स्वास्थ्य सेवामा पहुँच थप सहज हुने विश्वास पनि व्यक्त गरिएको छ ।

नजिकका छिमेकी राष्ट्र भारत र नेपालबीच व्यापक तथा बहुक्षेत्रीय सहकार्य रहँदै आएको उल्लेख गर्दै, यस्ता उच्च प्रभाव सामुदायिक विकास परियोजनाहरूले स्थानीयस्तरमा आवश्यक पूर्वाधार विकास गर्न सहयोग पुर्‍याउने विश्वास व्यक्त गरिएको छ । साथै, यस्ता परियोजनामार्फत नेपाल सरकारले अघि बढाएको विकास र प्रगतिका प्रयासलाई भारत सरकारले निरन्तर साथ दिँदै आएको सन्देश पनि कार्यक्रममा व्यक्त गरिएको थियो ।